Ciclo Formativo Grao Básico

O noso centro ofrece o Ciclo Formativo de Grao Básico en Informática de Oficina, unha proposta educativa pensada para acompañar ao alumnado nun proceso de aprendizaxe progresivo, práctico e adaptado ás súas necesidades, cunha duración de 2000 horas distribuídas en dous cursos académicos.

Este ciclo constitúe unha oportunidade para seguir aprendendo a través dunha metodoloxía máis práctica e aplicada, na que o alumnado desenvolve competencias básicas relacionadas coa informática, a organización de tarefas de oficina e o uso responsable das tecnoloxías. A formación combina aprendizaxes técnicas con hábitos de traballo, responsabilidade e autonomía, fundamentais para a súa evolución persoal e académica.

Que titulación se obtén?
Ao superar o ciclo, o alumnado obtén o Título Profesional Básico correspondente. Ademais, pode obter o título de Educación Secundaria Obrigatoria se o equipo docente considera alcanzados os obxectivos da etapa na avaliación final.

Validez do título
Trátase dunha titulación con validez académica e profesional que permite o acceso directo a ciclos formativos de grao medio, favorecendo así a continuidade no itinerario educativo do alumnado.

Requisitos de acceso
Para acceder a este ciclo é necesario ter entre 15 e 20 anos no ano de inicio, ter cursado 3º de ESO ou, de forma excepcional, 2º de ESO.

Saídas profesionais
Este ciclo prepara para o desempeño de tarefas básicas en diferentes ámbitos, como auxiliar de oficina, apoio en sistemas informáticos, gravación e tratamento de datos, dixitalización de documentos ou apoio en instalación e mantemento de equipos informáticos, entre outras funcións.